مرحبا بكم فالجزائر الجديدة
حطينا انشغالاتكم في عين الاعتبار
راح نحكولكم على إنجازاتنا في قصيدة
رانا درنا مشاريع كبار
نهضة البلاد ما راهيش بعيدة
خلاص رانا اتخذنا القرار
باش نحلو السطاد تع بليدة
وتعيشو معانا الابتكار
حنا نحبولكم الحاجة المفيدة
انتوما ما سمعتوش في الأخبار
وما قريتوش فالجريدة
رآه قريب ينشق البحار
وراح نعاودو نعمروه بسعيدة
و ندهشوكم بالأفكار
و لي يعارضنا عندو عقوبة شديدة
يخرجو مسيرة زعما ثوار
فقنالهم حبو يديرو مكيدة
باش يزعزعو الأمن والاستقرار
مع حكام المريخ عندهم علاقة وطيدة
حبو يدخلو الأرض في استعمار
مايحشموش عندهم قلام عنيدة
واش راح نديرو بالسبيطار
ماعندهمش الايمان وناقصين عقيدة
ياك كامل نموتو كاش نهار
حنا خلاص درنا الخطوط العريضة
باش نقصولكم فالأسعار
واش دخلنا حنا خاطينا
المشكل رآه فالتجار
ياك أزمة البطاطا رانا حليناها
ونشأنا جامعة الفلفل الحار
وراح نصدرو القشور تع التشينا
ونشجعوكم على الاستثمار
ونزيدو نهدرو على المرأة مسكينة
و نديرو بيها اشهار
انتوما خرجتو للحراك و احنا لي ستقلينا
حبيتو يستقل القضاء
ما تخموش هذا المطلب ما نسينا
موراها نديرو طاكسيات للفضاء
ما تتقلقوش هذا وين بدينا
العهدة هذي نحصلوها فالوباء
ماشي غرضنا ولا في يدينا
حنا للكراسي عندنا ولاء
شاعر الحراك الشعبي محمد تاجديت، 232 يوم في السجن بدون محاكمة